Naceu en Villardonas (Ribas del Sil, San Clodio) o 2 de abril de 1908, e morreu en San Clodio o 17 de decembro de 2006.
Seus pais foron Xoán A. González (Villardonas, mestre, perito agrimensor e sobrestante de obras públicas) e Josefa Fernández Álvarez (Fisteos, Quiroga, ama de casa). Seus avós paternos foron Manuel González (Villardonas) e Josefa Arias (San Clodio), e os maternos Antonio Fernández (Fisteos) e Anastasia Álvarez de Gestoso (Lor, Quiroga). Foron 15 irmáns (comerciantes, labradores, un oficial da Renfe…), e ela foi a máis pequena. Casou con José Ramón Santamaría López (O Carballiño, Ourense, auxiliar de farmacia) e tivo tres fillos: Teresa (mestra), José Ramón (farmacéutico) e Juan Antonio (profesor de Secundaria).
Estudos de Primaria e Bacharelato
Fixo os estudos de Primaria na escola de San Clodio, e o Bacharelato no Instituto General y Técnico de Lugo, acadando o título o 9 de agosto de 1926.
Estudos universitarios
Ingresa na Universidade de Madrid en 1926 para estudar Ciencias Exactas, pero para o curso seguinte xa se matricula na Facultade de Farmacia de Santiago de Compostela, conseguindo o título de licenciada o 19 de febreiro de 1932.
Tamén estuda simultaneamente Maxisterio na Escola Normal de Lugo, onde obtén o título de mestra o 20 de febreiro de 1931. Ao rematar os seus estudos tiña proxectado facerse dentista, pero a morte repentina do seu pai truncou os seus plans.
Oficina de Farmacia
Abre a oficina de farmacia en San Clodio en 1932, despois de facer as prácticas ese mesmo ano na Farmacia de Justina Amalia García Calvo, en Castroverde.
Exerceu de inspectora farmacéutica e farmacéutica titular desde o 15 de setembro de 1932 ata 1972.
Outros cursos
Foi moi activa na súa carreira, facendo numerosos cursos como o “Curso de análise bromatóxico” na Facultade de Farmacia de Santiago de Compostela (29 de setembro de 1931), ou “Ampliación de estudos sanitarios” no Instituto Provincial de Sanidade de Pontevedra (29 de outubro de 1931).
Obtivo o título de técnico farmacéutico de la Hermandad Sindical de San Clodio (Ribas de Sil) pola Delegación de Sindicatos de Lugo (xuño de 1952).
