Naceu en Escairón (O Saviñao) o 23 de outubro de 1916, e alí morreu o 3 de marzo de 2012.
Seus pais foron José Benito Lamelo (1891, Ribas de Miño, mestre en Piñeiró) e Dolores Díaz Mariño (1889, Piñeiró, O Saviñao, ama de casa). Seus avós paternos foron Manuel Lamelo (Vilarde, Ortelle) e Teresa López (Ribas de Miño), e os maternos Manuel Díaz (Mourelos, Piñeiro) e María Juana Mariño (Mourelos). Tivo catro irmáns: Manuel, María Dolores, María Teresa (profesora de Bacharelato de Física e Química) e Carmen.
Estudos de Primaria e Bacharelato
Fixo os estudos de Primaria en Piñeiró (Escairón, O Saviñao), e despois estudou o Bacharelato no Colexio da Milagrosa de Lugo ata 1933, examinándose por ensinanza libre no Instituto de Ensinanza Secundaria de Lugo. Termina ditos estudos en Santiago de Compostela, entre os anos 1934 e 1936.
Estudos universitarios
Por mor da guerra non puido comezar a carreira ao rematar o Bacharelato, así que participou na farmacia do Laboratorio Militar, preparando material de curas para o exército.
Posteriormente estuda na Facultade de Farmacia de Santiago de Compostela de 1939 a 1945. Obtivo o título de licenciada o 26 de decembro de 1945.
Carreira profesional
Exerceu como farmacéutica en Escairón (O Saviñao) desde o 21 de abril de 1948 ata a súa xubilación.
